Nix em Büggel äver all jot drop!

2020/21

Mer han leider su enen Zeddel vun dr Stadt bekumme, wo drin steiht, dat mer dis Johr nüs veranstalde dörfe. Et fällt uns schwör, ävver mer mache dat su un haale uns zoröck. Dat maache mer, weil mer dran jlöve, dat dat rischtisch is, su wie die dat sage. Mer hoffe, dat mer uns dann am 20. November 2021 ad widder sin, wenn mer en zünftisch Prunksetzung MET Dreijesteensproklamazion fiere künne! Blievt all do drusse jesund!

 

Us dem Coronia-Tageboch vun enem Literaten...

Et es wie et es. (§1 Kölsches Grundgesetz)

Och wenn isch noch nit lang der Literat vum KAZI en Luhme ben, hat ich immer schon jewusst, dat isch dem Ding jewahße wör. Dä Verein is jot vernetzt en dr Brangsche, isch wor jot injefööht wodde un de Saache, di en öndlisch Sitzung bruch, sin jo ad miest de jliche: Jode Musik zom Schunkele un Metsenge, Sprochvürdräger, di uns Publikum ens öndlisch metnemme op de Reis durch et Zwerchfelljebirch, ne joode Schwung Akrobatik, jarniert met Nostalgie un ner öndlisch Schüppche Nohwohß un un un... So daacht isch, dann weed schun klappe...

Ävver erjendswie zigg Äschermettwoch han mer dr Salat - Corona is jekumme un jeiht ad nit mieh fott. Se stellt dr karnveal völlisch op dr Kopp. Un su jähn isch Spaß an dr Freud han, so eenst wedde isch, wenn isch do an et Engk vum Leed denke: do is en Angs för en janze Industrie-Zweich, de Veraanstaldungsindustrie... un uns Karneval weed jet broche, um ad widder su unbeschwät ze verloofe wie mer dat jewennt sin. Dat ens enzesinn wo  schun ens et Schwörste för uns Kanrevalisten met Hätz un Siehl und och die "Dat wor schun immer su_Tradizionalisten" - un doch, dat Corönche wor nit uszetrickse, denn noh dem Kölsche Grundgesetz müsse och de Karnevalisten am Engk ens insehe: § 1 - et es wie et is.

Em Fröhsummer 2020, zo dr Zigg, maache isch eijentlisch dat Projramm för 2021/22 ad fädisch, ävver et Pandemie Coronia hat uns all do schun voll em Jriff. Ävver mer all - Künstler un Vereine, Büros un Ajenturen, mer han uns Mot jemaat, wel wejen dem § 3 - Et hätt noch immer jot jejange! "De Session weed schun ens irjendswie stattfinge. Doch langsom nohm § 7 Överhangk: Wat wellste maache? Un su kom de Erkenntnis ad wie naaks en Latänepohl, dat mer ens Angs han sullte, wat de komplette Session anjeiht. Do hät och nit der § 2 gehulfe: Et kütt wie et kütt - wenn et dann kütt, stemp dat, äver wenn net...

Doch immer noch versöökte mer, Plänche ze schmiede, wie et doch irjendswe klappe künnt. Ävver Poostekoche: winniger zom Zoschaue, winniger op dr Bühn, winniger Tische im jlich große Raum? Dat deit uns alles nit jefalle. En Stein en dr Brandung wore de Künstler un de Ajenturen: di wusste all, dat mer dat net su han welle, et is ävver su jekumme. Ne hätzlische Dank noh alle do drusse, die 2020/21 bei uns op dr Böhn jewässe wöre... mir sin uns widder, weil wejen § 5 "Nix bliev wie et wor"!

Irjenswann am Ängk vum Oktober wor et dann alle klor. Et weed nix jevve... Frei noh § 8 "Mach et jot, ävver net ze off!" musste mer de Fasteleer ens uslosse. Mer hoffe all, dat mer nor ein einzig Mol op all dat he verzischte mösse. Ad Zigg han isch met dr Könstler un de Ajneturen versöök, dat Projramm enfach en et övvernöhste Johr ze schibbele. Denn de Jesetzmäßigkeit vun § 4 is en Beß: "Wat fott is, is fott!", ävver dat wulle mer net. Et sull ad nit fott sin, et sull einfach jet spöder kumme.

Vielleisch kütt och en Zgg, wo mer uns völlisch neuer Ideen zowende mösse, wo mer zeige künne, wat noh jeht... wenn mer dann viellesch dr Fasteleer mol janz anfders fiere, blevt einfach dobei un treck nit jlich § 6 noh vürre "Kenne mer net, bruche mer nit, fot domet!"  oder versteckt üch hinger §9 "Wat sull dä Quatsch?". Mer wisse ens janz jewiss... ejal wat och passet, mer haale zesamme un mache uns Freud su jood et jeiht un su noh, wie mr dat dörfe! Mer hoffe, dat mer bal widder §10 hochleben losse künnte ("Drink doch ene met!") in der klore Vürstellung, dat mer in e paar Jöhrche all drövver laache künne ("Do laachste Disch kapott", § 11).

Isch för ming Saach dun Üch versrpäche: isch pack die Projramme wenn nüdisch noh ellf mol aan, öm se anzepasse för dat wat baal widder möglisch sin weed! Wä jet dozo ze sage hät (Wönsche, Fraage oder Aanrejunge...) dä kann mer schrieve: Literat@Karnevalistenzirkel.de

Blievt jesund, bis demnächs,
Ühre Literat
Henning Jahnke

Mer levve dat Brauchtum un maachen Rabatz: Der KAZI Sitzungskarneval!

Leev Närrinnen und Narren, ich bin Ingo Thomas un ich wor Üre Sitzungspräsident. Vun November 2005 bes Mai 2017 wor ich he in Amp und Würden und han mich noh jedes Mol drop jefreut, för Üch de Spass ze maache.

An minger Sigg hatt ich minge Literat Johannes Wingenfeld, dä mir zigg 2009 de Sitzunge jebaut hät - un wie ich fingk es im dat joot jelunge! För mich is dis Johr Schluss an dä Spitz, ävver ich bin jän noch im Elferrat, denn dat hätt mer mit de Junge immer Spass jemaht.

Im Mai hatte mer Wahle un ich han dem Jeschmölzge op dr Haupversammlung empfohle, dem Johannes de Job ze jevve, weil hä einfach der Typ is, dä dat wigger mache kann, wat mer de letzte Johr opjebaut han.

Et wor mir en Ihr, för Üch de Präsedöres ze maache.

Vill Jröße

Üch singe
Ingo Thomas

Vum Dude opjestande und su vital wie nie: Der 11er-Rat us Luhme

In Kölle bes de als Büttenredner immer jesäänt, wenn de ne passende Spruch för de Junge hinger de Britz dobei häs. Irjendswat mit "No, sidd Ehr och schon waach?" oder "Künnter net schlofe?" bringe immer die erhofften Lacher. Evver in Luhmer wede sulch Phrase schnell un spontan us dem Projramm geworfe, denn uns Elferrat is en Raket.

Die Jungens machen da de Aap und bringe de Lade so richtich in Schwung un versprühe dobei ene Charme wie Animateure im Robinson-Club - nor halt anjezoge.

Der Elferrat is en handverlesen Trüppche, dat de Präsedöres während dä Sitzung ungerstötzen deit. Et zällt nit, in welcher Abteilung do bes oder wat de schon alles dolles jemaht häs, he jeit et nor um Kondition und de Leichtigkeit des Seins! Un dat heiß nit nur Bier holle und Schnaps suffe.

Nä, do müsse Notize jemaht wedde, wä noh ze bejröße is. Do müsse Blömcher ranjebraht wedde und Wasser an die Tanzjruppen verteilt wedde. Do muss in Formation jedanz wedde, mit Leuchtstäbche gewunke wedde und dat alles ohne et zu övverdrieve. Dat is ne Job, ävver en richtisch schöner!